Bei Dior

Qilmishim xato-yu rasvolik boʻldi,
Qay ishni boshlamay gʻavgʻolik boʻldi.
Qorilgan loyimning taʼmini bilmay,
Orzuyim hamisha daholik boʻldi.

Jo‘rabek Ramazon

Dunyo oq emasdir, yo‘q, qora bardosh.
Kuyib, yodimizdan kechganlar aytsin.
So‘zlarida zahar, ko‘zlarida tosh,
Tilidan, elidan kechganlar aytsin.

Tunlar bosib kelar dunyo hasrati,
Kunlar gizli tug‘yon, bosib kelar she’r.
Nechuk qismat erur, shoir qismati?!
Tushlarimni buzar hazrat Alisher...

Yillar bahorimni uchirdi chalqib,
Muzlarga ko‘churdi o‘tluq yozimni.
U muhitda xas kabi qalqib -

Men o‘z Yulduzimni, o‘z Quyoshimni...
Yulduz sen, Quyosh sen, sen, ona xalqim,
Sen uchun sindirdim sinmas sozimni.

Rauf Parfi

Dunyo oq emasdir, yo‘q, qora bardosh.
Kuyib, yodimizdan kechganlar aytsin.
So‘zlarida zahar, ko‘zlarida tosh,
Tilidan, elidan kechganlar aytsin.

Tunlar bosib kelar dunyo hasrati,
Kunlar gizli tug‘yon, bosib kelar she’r.
Nechuk qismat erur, shoir qismati?!
Tushlarimni buzar hazrat Alisher...

Yillar bahorimni uchirdi chalqib,
Muzlarga ko‘churdi o‘tluq yozimni.
U muhitda xas kabi qalqib -

Men o‘z Yulduzimni, o‘z Quyoshimni...
Yulduz sen, Quyosh sen, sen, ona xalqim,
Sen uchun sindirdim sinmas sozimni.

Rauf Parfi

Hammasi Xudodan —
Parvardigordan,
Uning hukmi ila dunyoda borman.
Yaxshiman, yomonman, senga do‘st-yorman, Oshiqman,
Ojizman,
Mehringga zorman.

Shukur Qurbon

Ming bo‘lakka bo‘lib dunyoni
Tug‘ilgandan baxtni izlaymiz.
Qo‘llaridan tutib ro‘yoni
Atrofda baxt, ba'zan bilmaymiz!

Baxtlar bilan bezatilgan taxt,
Xudoyimga yetsa bas zoring
Kimdir seni sog‘insa, shu - baxt,
Baxt — aslida dunyoda boring!

Kimlarnidir sevib, sog‘inib,
Intizor-la uni kutganing.
Baxt aslida tomog‘ing bilan
Shu bir qultum suvni yutganing!

Hamma yerda baxtlaring sochiq
Bahorlardan go‘zallik yiqqan,
Baxt emasmi? Ko‘zlaring ochiq?
Osmonga boq, ko‘kka oy chiqgan!

Senga yana nima yetmaydi?
Hattoki, baxt — yelib, tolmoqlik.
Hammaga ham nasib etmaydi,
Tongda turib nafas olmoqlik!!!

Erkin Vohidov

Tug‘ilmasdan oldin men
Chiqib Arshi a'loga,
Oyni o‘pib, qoldim men
Yulduzlardan baloga.

Tug‘ilgandan to shu dam,
Qo‘msab kecha-kunduzlar.
Oy qani deb yig‘lasam,
G‘iybat qilar yulduzlar...

Hiqqillama, der yurak,
Dunyo bilan ishim yo‘q.
Bo‘lsa menga Oy kerak.
Yulduzlarga hushim yo‘q!

Muhammad Yusuf

Har kimning ham sochlariga oq tushsin,
Ajin tushsin yuzlariga, dog‘ tushsin.
Har kimning ham quvvat ketib belidan,
Qo‘llariga aso — bir tayoq tushsin.

Imoni sof, yuzga kirib yorug‘ yuz,
To‘ylar ko‘rib yelkasidan tog‘ tushsin.
Jismiga so‘nggi safar oldidan
O‘z bolasin qo‘lidan tuproq tushsin...

Muhammad Yusuf

Ko‘p yo‘llardan ketding:

Birinining ismi — Makr,
Birinining ism — Jahld,
Birinining ismi — Yolg‘on,
Birinining ismi — ...

Uzilay-uzilay deydi,
Qaytishning
Birgina yo‘li — KO‘NGIL.

Usmon Azim

Yomg‘irlar qo‘shig‘i yangraydi bog‘da,
Chamanlar husniga boq. Juda ko‘rkam.
Shundayin g‘animat, foniy bir onda,
Kel, sayr qilaylik birga, malikam.

Hijron dog‘larini yuvib ketsin ul,
To vaslingga zarra qolmasin shubham.
Ko‘nglim gulzorida asraganim — gul,
Kel, sayr qilaylik birga, malikam.

Ista, yomg‘ir po‘shni qilaylik pana,
Quchoq ochaylik yo tomchiga, erkam.
Yaratgan rahmatin, bulut himmatin
Birga qarshilaylik, kelgin, malikam.

Yo‘llar tugamasa, yomg‘ir tinmasa,
Bir juft qush misoli qo‘nishib, kezsak...
G‘uborlardan xoli bo‘lgan dunyoda
Pokiza muhabbat borligin sezsak.

Kel, sayr qilaylik birga, malikam...

Dilmurod Do‘st

Arzimaydi ginalar qilmoq,
Bunda armon haddan ziyoda.
Naqadar sof - birodar boʻlmoq,
Gʻanimatmiz gʻanim dunyoda!

Yashaylik, doʻst, bekam, chiroylik,
Shundogʻam koʻp bunda dard, kadar.
Doʻstlik ila yengib turaylik
Dunyo bizni yenggunga qadar...

Xayrulla Hamidov

Dunyo
Ko‘ksimga sig‘madi.
Dunyo
Qog‘ozga sig‘madi.
Dunyo
Aqlga sig‘madi.
Faqat aqldan ozishga
Sig‘di bu dunyo.

Usmon Azim

Tashvishlanmang!
Nechun xavotir!
Men olisdan qarayman sizga.
Siz xuddi tong monandsiz — harir
Sokingina turishingizda.

Imo aylang — ketaman yigʻlab,
Cheksiz hijron dashtlari sari.
Va sheʼrlar ham yozaman minglab! —
Faqat sizni taʼrif etgani.

Shu ketishda magar eslasam,
Gulga toʻlar koʻnglimning ichi.
O, albatta! — siz kabi odam
Bu dunyoda borligi uchun!

Tillarimda ne oʻtligʻ kalom!
Ammo qanday soʻylayin sizga:
Hatto sheʼr ham beradi ziyon —
Bu harirhol turishingizga.

Umrim borar jami sarhadni
Chulgʻayapti ruhning patvozi.
Menga sizni bir bor uchratdi —
Hayotimdan roziman, rozi.

Usmon Azim

Unutma, xudoyim bizni erkalab,
Uchrashtirib qo‘ygan kunni unutma.
Unutma, yuzingdan olgunimcha lab,
Qushdek uchib ketgan tunni unutma.

Bir tola sochingni aylagan tumor, Bo‘ylaringdan mast-u bo‘yingga xumor –
Kim bo‘lsa, o‘shani unutma zinhor,
Bag‘ri qon, yuragi xunni unutma!

Umrim orom bilmay o‘tar alomat,
Sen qayerda bo‘lsang, shunda halovat.
Qaylarda bo‘lsang ham bo‘lgin salomat,
Men seni sevaman, shuni unutma!

Iqbol Mirzo

...Yig‘lamang demangiz, qo‘ying, yig‘lasin,
Axir ko‘zyoshlarda qancha hayo bor.
Ayoli yig‘lashni bilmagan elning
Ori yo‘q, millatman degani bekor.

Yig‘lamang, demangiz, qo‘ying, yig‘lasin,
Ko‘zyosh to‘ka bilgan ayollar – botir.
Ayollari orsiz bo‘lgan millatda
Ori baland erlar o‘smaydi, axir.

Gulrux Xudoyorova

Uzilib, zil bo‘ldi ko‘nglimning choki,
Hozir alam bilan bitayapman bayt:
Mensiz ahvolingga yig‘laymi yoki
Sensiz ahvolimga kuyayinmi, ayt?

Mashriqlardan kutib olgali bongni,
Dunyo saf tortadi xushro‘y shaharda –
Men hali o‘nglolmay bu telba ongni,
Quyosh charaqlaydi tong-la saharda!!!

Xo‘sh, men nima qilay bundayin tongni,
Sensiz kirib kelar tundayin tongni???
Sening noming bilan oqajak bu qon,
Ollashib bormoqda o‘ylagan sarim:
Ko‘zlarim qa’rida egizak vulqon
Izhor qila boshlar bor qayg‘ularim.

Sensiz on asrlar o‘tganga o‘xshar,
Yer meni o‘ziga yutganga o‘xshar.
Sen tomon o‘tmoqqa imkonim bor-u,
O‘rtada ajdaho yotganga o‘xshar.

Nima bo‘ldi menga, xayol jontalash,
Majnun belbog‘ining yirtig‘i menda.
Farhod ko‘tarolmay qolgan qo‘shbardosh,
Menga, faqat menga, ortig‘i menga!!!

Juldur kiyimlarga sanchiq tikanak,
Mening nomim endi mangu telbavor!
Pokiza dunyoga qarayman g‘amnok,
Bunda ul sho‘rlikning nima aybi bor !?

Oh, sensiz yashashlik azobi g‘alat,
Bo‘rtib chiqqanmi-yey yelkamda tog‘lar...
So‘ngsiz nigohingni men tomon qarat,
Cho‘llagan yuzimda uyg‘onsin bog‘lar!

Ayt, meni qutqarsin ilohiy amr,
Sokin tunlariga qaytar yurakni.
Vujudim binosi so‘raydi ta’mir,
Kechiktirma, yorim, o‘zing darakni!

Buni araz degil va yoki gina,
Mayli, bo‘lari - shu... holim parishon.
Sening ovozingni eshitibgina,
Yana bu dunyoga qaytaman, ishon!

So‘rovim, tilovim, shugina borim,
Dunyo-i duningga qaytib qo‘y meni.
Hech qursa, hech qursa, hech qursa, Yorim,
Ko‘rib turganingni aytib qo‘y meni!

Xayrulla Hamidov

Bu dunyoga keldingmi?
Endi yasha!
Tishni tishga qo‘yib-qo‘yib yasha.
Mushtingni tugib-tugib yasha.
Chidab-chidab yasha. Yashashni chidaganga chiqargan!
Bu dunyoga keldingmi?
Endi chida!
Dunyo – chidaganniki! Oxirigacha chida.
Xudo bergan kunigacha chida!

Tog‘ay Murod

Dard boru darak yo‘q darmonimizdan,
So‘ramang, aytmaylik armonimizdan.
Yo rabbiy, bizga g‘am donin ilinma,
Bir kapsam shodlik ber xirmonimizdan.

Mansur Jumayev

Kutish - og‘ir,
Kutish - tosh.
Kun - betaqdir,
Umr - yosh.

Kutish - zindon,
Muz u muz.
Jallod - hijron,
Bo‘g‘zim uz !..

Jon-u tanni tilkalar,
Yurakni yorar sitam...
Seni ko‘rgim kelmoqda,
Xudo xohlamasa ham.

Usmon Azim

Muhabbat ulki, insonlarni bir-biriga talpintiruvchi gravitatsiya. Muhabbet -"elektr toki"dirki, u bizda mavjud eng ezgu xislatlar quvvatini oshiradi va faqat uning sharofati bilangina insoniyat o‘z xudbinligi ichida mahv bo‘lmadi.

Albert Eynshteyn