ژینگە؛ ئەو هاوارەی لە پشت نووسەرەوە دەنگ دەداتەوە
مرۆڤ دەتوانێت لە ژینگەکەی دووربکەوێتەوە بەڵام بە ئاسانی ناتوانێت لە کاریگەرییەکانی دەربچێت.
لە ئەدەبی کوردیدا، شێرکۆ بێکەس نموونەیەکی دیارە. ئەزموونی جەنگ، ئاوارەیی، کۆچ و بارودۆخی سیاسی و کۆمەڵایەتیی کوردستان لە هەندێک لە هۆنراوەکانی ئەودا دەبینرێت. بۆیە سروشت، ئازادی، مرۆڤ و خاک لە شیعرەکانی تەنها وێنەی جوان نین؛ زۆرجار دەبن بە زمانێک بۆ قسەکردن لە ئازار و هەستی کۆمەڵ.
لە ئەدەبی جیهاندا، جۆرج ئۆروێڵ نموونەیەکی ڕوونە. ئەزموونی ئەو لە کۆلۆنیالیزم، فەقر، جەنگ و ڕژێمە توتالیتارییەکان، کاریگەرییەکی گرنگی لەسەر جیهانبینییەکەی دانا. لە 1984 ـدا، ترسی دەسەڵات و کۆنترۆڵی بیرکردنەوە و زمان دەبن بە ناوەڕۆکی جیهانێکی ئەدەبی کە هەست بە مەترسییە سیاسییەکان دەکات.
لە فەلسەفەدا، فریدریش نیچە نموونەیەکی جیاوازە. ئەو تەنها لەسەر سروشت کاریگەری وەرنەگرت؛ پەیوەندییەکانی بە فەرهەنگ، ئایین، ئەخلاق و کۆمەڵگای ئەورووپای سەدەی نۆزدەهەم، بوون بە بەشێک لە پرسیارە بنەڕەتییەکانی فەلسەفەکەی: مرۆڤ چۆن خۆی دروست دەکات؟ کێ یاسای بەهاکان دادەنێت؟ و ئایا مرۆڤ دەتوانێت لە بەها کۆنەکان بپەڕێتەوە؟
لە هەموو ئەم نموونانەدا، ژینگە نووسەر بە تەواوی دیاری ناکات؛ بەڵکوو ماددەی خامی ئەزموونەکانی پێدەدات. نووسەر دواتر ئەو ماددەیە دەگۆڕێت بۆ شیعر، ڕۆمان، فەلسەفە و پرسیار.
کۆتایی
لەوانەیە دوو نووسەر لە هەمان شاردا بژین، لە هەمان کۆمەڵگادا گەورە ببن و تەنانەت هەمان جەنگ ببینن؛ بەڵام هەر یەکەیان جیهانێکی جیاواز بنووسێت.
چونکە:
ژینگە تەنها ئەو شوێنە نییە کە نووسەر تێیدا دەژی؛ ئەوە ئەو شوێنەشە کە بە شێوەیەکی نادیار لە ناو نووسەرەکەدا
دەژی.
https://t.me/qawaxanayklture/1070470#51♠️
